Ստեղծագործական եռուզեռ Թաիրովի միջնակարգ դպրոցում

Դպրոցի IVբ  դասարանի սաները դասվար Մերի Բաղրամյանի գլխավորությամբ  պատրաստել էին Հ. Թումանյանի «Ոսկե քաղաքը» հեքիաթային բեմականացումը: Դասվարը դասարանը վերածել էր հեքիաթային փոքրիկ աշխարհի:

Հնչեց երաժշտությունը և փոքրիկ դերասանների հրաշալի կատարմամբ ներկաները ակամայից հայտնվեցին Հնդկաստանի Բենարես քաղաքում:

Ներկայացման ողջ ընթացքում VI բ դասարանի սան Լիա Խաչիկյանի նվագակցությամբ հնչում էր երաժշտություն: Աշակերտները կատարում էին Հ. Թումանյանի «Ա՜խ, ի՜նչ լավ է սարի վրա» անզուգական երգը:

Ներկայացման ավարտին աշակերտները ներկայացրին ասույթներ և ասացվածքներ աշխատանքի և աշխատասիրության մասին:

Հեքիաթը նրանց սովորեցնում էր սիրել աշխատանքը և կյանքում լինել աշխատասեր ու ազնիվ, չէ որ աշխատանքը բոլոր առաքինությունների մայրն է:

Ներկայացման ավարտից հետո ելույթ ունեցան դպրոցի ուսմասվար Ս. Պետրոսյանը և տարրական դասարանների մեթոդմիավորման նախագահ Մ. Սահակյանը, որոնք գովեստի խոսքեր ուղղեցին փոքրիկ դերասաններին:

Այո, միջոցառումը հաջողված էր, որի վառ վկայությունն էին ընդհանուր հուզմունքն ու ծափողջույները: