«Մա´յր իմ, անուշ ու անգին» խորագրով միջոցառում Փարաքարի հիմնական դպրոցում

Որքա~ն նման են միմյանց մայրերը,  աշխարհի բոլոր մայրերը… Իրենց անքուն գիշերներով ու բազում հոգսերով, մանկական ժպիտից ստացած իրենց անպատմելի հրճվանքով ու զուտ մայրական հպարտությամբ, իրենց վեհ պատասխանատվությամբ: Դարեր ի վեր, բոլորի պես, մեր ժողովուրդն էլ ամենանվիրական հասկացությունները բնորոշել է «մայր» բառով: Ասում ենք`  Աստվածամայր, Մեծ մայր, Մայր հայրենիք, Մայր Արաքս, Մայրենի լեզու…

 

Երեխաների շուրթերից հնչում են մորը նվիրված հայ բանաստեղծների քնարական, հուզառատ բանաստեղծությունները: Հինգերորդ դասարանցիները իրենց ասմունքով, երգերով, շվիի ու դուդուկի հուզառատ հնչյուններով հուզեցին միջոցառման մասնակիցներին, որը միահյուսվում էր երեխաների սրտից բխած անկեղծ խոստովանությամբ «Սիրում եմ քեզ, մա´մ ջան»:

 

Մորս արցունքի պարզությունն ունեք,

Գոհար կաթիլներ` գարնան անձրևի,

Դուք մորս կաթի քաղցրությունն ունեք,

Զմրուխտյա ջրեր` մեր աղբյուրների:

 

Այս միջոցառումն երեխաների երախտիքի խոսքն է ուղղված իրենց «մինուճար» մայրերին`  նրանց անհոգ, ուրախ, երջանիկ տեսնելու ակնկալիքով: Միջոցառումը ուղեկցվում էր թեմային համահունչ գեղեցիկ սահիկներով: