Փայլուն մասնակցություն «Հայ ասպետին»

Խաղն անցավ թեժ մրցապայքարում: Բազմաթիվ հարցերից Մաշտոցի անվան դպրոցի թիմը վաստակեց բարձրագույն գնահատականը` «Հայ ասպետ»: Ավագների մրցույթում փայլուն հանդես եկավ թիմի ավագ Սուրեն Թադևոսյանը:

 

Արդյունքում Չարենցավանի թիմը 61 միավորով գրավեց 2-րդ պատվավոր տեղը`զիջելով Ապարանի թիմին: Սակայն լավ խաղ ցուցաբերելու շնորհիվ նրանք նույնպես հնարավորություն ստացան մասնակցելու կիսաեզրափակիչ փուլին:

 

«Հայ ասպետ» հաղորդաշարը ունի ճանաչողական, ուսուցողական և դաստիարակչական մեծ նշանակություն: Նկարահանմանը նախորդող 2 ամսվա ընթացքում դպրոցի 15 աշակերտներ ուսուցիչների ղեկավարությամբ ուսումնասիրեցին հանձնարարված գրականությունը:

 

Այնուհետև նրանցից կազմվեցին 5 հոգանոց հիմնական և 6 հոգանոց օգնական խմբերը: Հիմնական կազմում ընդգրկված աշակերտները լավագույնս դրսևորվել են առարկայական օլիմպիադաներին, արժանացել դիպլոմների: Այս ընթացքում աշակերտները ձեռք բերեցին բազմակողմանի գիտելիքներ հայագիտության վերաբերյալ: 

 

Ամռանը կտրվեն նոր հանձնարարությունները և հոկտեմբերին կանցկացվի կիսաեզրափակիչ փուլը: Չարենցավանի Մ. Մաշտոցի անվան դպրոցի աշակերտները հուսով են, որ իրենց թիմը այդ փուլին ևս հանդես կգա արժանավայել և կարժանանա հաղթական մրցանակին: