Արդի արվեստի և հոգևոր ֆիլմերի միջազգային փառատոն Հայաստանում

Նա հավելեց, որ փառատոնի նպատակը ոչ միայն հոգևոր ասելիք ունեցող համաշխարհային կինոնմուշների ցուցադրությունն է, այլ նաև դրանցում արծարծված հարցերի շուրջ առողջ և ազատ հանրային քննարկումների կազմակերպումը: Քննարկումներին կմասնակցեն ոչ միայն ժապավենի ստեղծողները, այլև հոգևորականներ, հոգեբաններ և ֆիլմում արծարծված խնդիրներին անմիջականորեն առնչվող մասնագետներ, ոլորտի պատասխանատուներ:

 

Շ. Նազարենկոյի խոսքով, փառատոնը կհանդիսանա նաև մեր երկրում անցկացվող մյուս փառատոնների խտացումը, որը կմիավորի թե՛ տարեցներին, թե՛ երիտասարդներին, թե՛ սահմանափակ կարողություններ ունեցող անձանց:

 

Փառատոնի հոգևոր խորհրդատու Տեր Եսայի քահանա Արթենյանի դիտարկմամբ, պետք է ընդունել, որ հասարակության մեջ կա հոգևորի հետ հաղորդակցվելու բացը և փառատոնի միջոցով փորձելու են որոշ չափով լրացնել հենց այդ բացը:

 

«Մեր խնդիրը հոգևոր արժեքների ամրապնդումն է, և սա էլ մի քայլ է, մի միջոց է այդ նպատակին հասնելու համար»,- ասաց քահանան:

 

Փառատոնի կազմկոմիտեի անդամ Աննա Կարապետյանը նշեց, որ փառատոնն ընդհանուր առմամբ տևելու է տասը օր, որի շրջանակում Երևանում և Հայաստանի տարբեր գեղատեսիլ վայրերում կազմակերպվելու են կինոդիտումներ, ինչպես նաև զանազան այլ միջոցառումներ:

 

«Արդեն ունենք մեծ քանակությամբ ֆիլմեր, արդյունքը սպասվածից ավելի մեծ էր»,- ասաց նա:

 

Այսօրվա տվյալներով, արդեն ստացվել է շուրջ 300 ֆիլմեր աշխարհի 25 երկրներից:

 

Փառատոնի ընթացքում ֆիլմերը կցուցադրվեն ինչպես մրցութային, այնպես էլ ոչ մրցութային կարգով: Փառատոնին կարող են մասնակցել խաղարկային և վավերագրական, լիամետրաժ ու կարճամետրաժ տարբեր ձևաչափերի ֆիլմեր, տեսանյութեր, որոնցում դատապարտվում են պատերազմները, բռնությունը, ազգային, կրոնական և ցանկացած այլ տիպի խտրականությունը, մարդկային գործոնների հետևանքով ծագած էկոլոգիական աղետներն ու քարոզվում խաղաղություն, հանդուրժողականություն, մարդասիրություն և համամարդկային այլ արժեքներ:

 

Շուրջօրյա բացօթյա ցուցադրությունները լինելու են անվճար: Նախատեսվում է, որ փառատոնը կլինի ամենամյա:

 

Աղբյուրը՝ www.panorama.am