Դաստիարակվում ենք հանճարեղ լոռեցու անմահ ստեղծագործություններով

Հոբելյանական միջոցառումների ծրագրի շրջանակներում դպրոցում անցկացվեցին գրական-գեղարվեստական ցերեկույթ, բաց դասեր, Հ. Թումանյանի գրքերի ցուցադրություն, ինչպես նաև հեքիաթների շարանի բեմականացում:

 

Անմահ Լոռեցու ստեղծագործություններին քաջատեղյակ աշակերտները իրենց կատարումներով ներկայացրեցին Հ.Թումանյանի կյանքն ու ստեղծագործությունը, ապացուցեցին, որ նրա համամարդկային մտքերով, լավատեսությամբ, հանդուրժողականությամբ և ազգասիրությամբ դաստիարակվում է մի ամբողջ ազգ:

 

Լինելով ազգի արժանավոր զավակ՝ Թումանյանը խորապես կիսել է ժողովրդի վիշտն ու տառապանքը՝ երբեք չընդունելով լալկան տրամադրություններ: Նա իր պարզ և ժողովրդական լեզվով արտացոլել է հայ ժողովրդի  հոգեբանությունը, մտքերն ու ձգտումները: Միջոցառումների եզրափակիչ ակորդը Հ. Թումանյանի «Պոչատ աղվեսը» հեքիաթի բեմականացումն էր 2-րդ դասարանի աշակերտների կողմից (դասվար` Ս. Կարապետյան):

 

Փոքրիկ «դերասանները» զարմանալի անմիջականությամբ, բնական ու անկեղծ խաղով ներկայացրեցին բեմականացումը՝ վերարտադրելով գեղարվեստական կերպարների ճիշտ բնութագիրը: Նրանք իրենց յուրահատուկ հագուստներով մարմնավորում էին հեքիաթի  սիրված և հարազատ հերոսներին: Ակտիվ էր նաև  հանդիսատեսը: Սիրված հեքիաթի հերոսները ոգևորել էին նրանց՝ հորդորելով երբեք չհեռանալ հեքիաթների կախարդական աշխարհից: