Հետաքրքիր փաստեր Փարիզի ամենաբարձր աշտարակի մասին

Այն կանգնեցվել է Բաստիլի գրավման 100-ամյակի պատվին՝ 1889թ.-ի Համաշխարհային ցուցահանդեսին ընդառաջ՝ դառնալով աշխարհի ամենահեղինակավոր ու ճանաչված հուշարձաններից մեկը:

 

Էյֆելյան աշտարակի 125-ամյակի առթիվ ձեզ ենք ներկայացնում 15 հետաքրքիր փաստ՝ ամենահայտնի զբոսաշրջային կոթողներից մեկի մասին:

 

1. Աշտարակի մտահղացումը Գուստավ Էյֆելին չէր պատկանում, այլ՝ ավագ ինժեներներ Մորիս Կոեչլինին և Էմիլ Նյուգիերին, ովքեր նախագծել են այն և Էյֆելի հրահանգով ներկայացրել նախագիծը ընկերության ճարտարապետության բաժնի ղեկավարին, որի հավանությունից հետո արդեն վերափոխված տարբերակը հանձնվել է Գուստավ Էյֆելին:

 

2. Էյֆելյան աշտարակի կառուցման հետ կապված տվյալները՝ 300 աշխատակից, կռած երկաթի 18038 կտոր, 2,5 մլն գամ, 10000 տոննա քաշ, 300 մետր բարձրություն:

 

3. Աշտարակը կառուցվել է որպես ժամանակակից գիտության խորհրդանիշ: Դրա կառուցման ժամանակ իր նորամուտն էր ապրում արվեստի մեկ այլ ճյուղ՝ լուսանկարչությունը, իսկ աշտարակի բացումից հետո այն ոգեշնչման աղբյուր դարձավ բազմաթիվ լուսանկարիչների համար:

 

4. Էյֆելյան աշտարակն աշխարհի ամենաբարձր կառույցն էր մինչ 1930թ.-ը, մինչ Նյու Յորքի ''Chrysler Building'' կառույցի շինարարությունը՝ 318 մետր բարձրությամբ:

 

5. Էյֆելյան աշտարակի վերելակները նախապես չեն գործարկվել: Մայիսի 6-ին տեղի ունեցած ցուցահանդեսի ժամանակ 30000 այցելուներն ստիպված էին 1710 աստիճանները ոտքով բարձրանալ, իսկ վերելակները գործարկվել են մայիսի 26-ին:

 

6. Փարիզի բնակիչները սկզբում չէին սիրում աշտարակը՝ այն «աչքի փուշ» կոչելով: Ըստ տեղական պատմության՝ հայտնի վիպասան Գի դը Մոպասանն ասել է, որ ատում է աշտարակը, սակայն ամեն օր լանչին ճաշում էր աշտարակի ռեստորանում: Հարցին, թե ինչու է այնտեղ ճաշում, վիպասանը պատասխանել է, որ դա միակ վայրն է, որտեղից այն չի երևում:

 

7. Եղանակի հետ աշտարակի բարձրությունը տատանվում է: Քանի որ այն պատրաստված է կավածեփ (կռած) երկաթից, աշտարակի մետաղական հատվածը լայնանում է ամռան արևի ներքո՝ ստիպելով կառույցին՝ բարձրանալ ևս 17 սմ-ով:

 

8. Էյֆելյան աշտարակը նախատեսված էր օգտագործել 20 տարի, սակայն Ֆրանսիայի կառավարությունն այն սկսեց օգտագործել ռադիոհաղորդակցության և հետագայում՝ հեռուստահաղորդակցության համար, իսկ երբ արտոնագրի ժամկետը սպառվեց՝ 1909թ.-ին, Փարիզի քաղաքային խորհուրդը որոշեց պահել այն:

 

9. Աշտարակը ողջ երկայնքով միագույն չէ: Մթնոլորտային երևույթներին հակազդելու համար այն մուգ է ներկված գագաթի հատվածում և ատիճանաբար ավելի բաց՝ ստորին հատվածներում:

 

10. Յոթ տարին մեկ 50-60 տոննա ներկ է կիրառվում՝ աշտարակը ժանգոտումից պաշտպանելու համար:

 

11. Էյֆելյան աշտարակը պարզապես զբոսաշրջային կոթող չէ: Այնտեղ գործում է թերթի խմբագրություն, փոստի բաժանմունք, գիտական լաբորատորիաներ, թատրոն, իսկ առաջին հարկն ամեն տարի վերածվում է սահադաշտի:

 

12. Այն աշխարհի ամենից շատ այցելվող հուշարձաններից է, որը տարեկան գրավում է 7 մլն այցելուի, 75 տոկոսը՝ արտասահմանից:

 

 

Սկզբնաղբյուրը՝ www.businessinsider.com