Զորավանի միջնակարգ դպրոցի աշակերտների այցը Հայաստանի ազգային պատկերասրահ

Այսպիսով, «Dasaran.am» կրթական ծրագրի նախաձեռնությամբ օրերս Կոտայքի մարզի Զորավանի միջնակարգ դպրոցի մի խումբ աշակերտներ՝ ուսուցչուհի Ն. Անտոնյանի ուղեկցությամբ, այցելեցին Հայաստանի ազգային պատկերասրահ:

 

Մինչև Հայաստանի ազգային պատկերասրահ հասնելը աշակերտները լցված էին մեծ խանդավառությամբ և սպասումով: Մտնելով Հայաստանի ազգային պատկերասրահ` աշակերտները սկսեցին բացահայտել իրենց համար նոր «աշխարհներ»:

 

Պատկերասրահի յուրաքանչյուր սրահը ազգային և համաշխարհային արվեստի բացահայտումների մի մոլորակ էր, ուր երեխաները ծանոթացան մեծանուն արվեստագետների բազմաոճ և բազմաժանր ստեղծագործություններին: Հատկապես աներևակայելի տպավորություն թողեցին Մարտիրոս Սարյանի, Հովհաննես Այվազովսկու, Վարդգես Սուրենյանցի, Զաքար Զաքարյանի յուրօրինակ կտավները: Ողջ պատկերասրահը իր զանազան գույներով, վեհ ու քնքուշ խոհերով պարուրել էր այցելուներին:

 

Տպավորությունները անջնջելի էին: Շրջագայությունը Զորավանի միջնակարգ դպրոցի սաների հիշողություններում միշտ կմնա որպես նոր գիտելիքների, տպավորությունների ձեռքբերման օր, որը մշտապես կուղեկցի նրանց ողջ կյանքի ընթացքում: