«Էլ Կլասիկո». «Ռեալ» - «Բարսելոնա»՝ 3:4

Հանդիպման հաշիվը 7-րդ րոպեին բացեց «Բարսելոնայի» կիսապաշտպան Անդրես Ինյեստան: Խաղի սկզբնամասում «Ռեալի» պաշտպանությունն այնքան էլ վստահ չէր գործում, բայց Լիոնել Մեսին ու Նեյմարը չօգտվեցին հյուրերի առավելությունը կրկնապատկելու հնարավորությունից: Իրական գոլային պահ կորցրեց նաև Քարիմ Բենզեման, ով հարմար դիրքից վրիպելուց րոպեներ անց խփեց «Ռեալի» պատասխան գնդակը: Ընդամենը 4 րոպե անց ֆրանսիացի հարձակվողը դարձավ նաև դուբլի հեղինակ՝ առաջ մղելով մադրիդցիներին: Բաց թողած գոլերից հետո «Բարսելոնան» կորցրեց խաղի վերահսկողությունը, սակայն առաջին խաղակեսի վերջնամասում Մեսին հավասարեցրեց հաշիվը և թիմերն ընդմիջման գնացին 2:2 հաշվի ժամանակ:

 

Ընդմիջումից հետո Արքայական ակումբը դարձյալ առաջ անցավ հաշվի մեջ: Կրիշտիանու Ռոնալդուն անվրեպ իրացրեց 11 մետրանոց հարվածը՝ խփելով 26-րդ գոլն Իսպանիայի ընթացիկ առաջնությունում: 10 րոպե անց «Ռեալի» պաշտպան Սերխիո Ռամոսը սեփական տուգանային հրապարակում գցեց Նեյմարին: Իսպանացին հեռացվեց խաղադաշտից, իսկ դաշտի տերերի դարպասին նշանակված 11 մետրանոցն անվրեպ իրացրեց Լեո Մեսին: 10 խաղացողներով մնացած մադրիդցիները խաղի վերջնամասում փակվեցին պաշտպանությունում, սակայն դա էլ Կարլո Անչելոտիի թիմին չփրկեց պարտությունից: 84-րդ րոպեին Մեսին իրացրեց եւս մեկ 11 մետրանոց հարված՝ խփելով հյուրերի հաղթական գնդակը և դառնալով «Էլ Կլասիկոների» պատմության ամենաարդյունավետ ֆուտբոլիստը:

 

«Էլ Կլասիկոն», միանշանակ, ստացվեց, իսկ Պրիմերայի չեմպիոնական մրցավազքն ավելի սրվեց: «Ռեալն» ունի 70 միավոր և Մադրիդի «Աթլետիկոյի» հետ գլխավորում է մրցաշարային աղյուսակը, իսկ «Բարսելոնան» ընդամենը մեկ միավոր է զիջում առաջատարներին:

 

Իսպանիայի առաջնություն, 29-րդ տուր 

 

«Ռեալ» - «Բարսելոնա»՝ 3:4

 

Քարիմ Բենզեմա, 20, 24, Կրիշտիանու Ռոնալդու, 55 (11մ.) – Անդրես Ինյեստա, 7, Լիոնել Մեսի, 42, 65 (11մ.), 84 (11մ.)

 

Հեռացում՝ Սերխիո Ռամոս, 63 («Ռեալ»)

 

Աղբյուրը՝ sport.news.am