Միջոցառում` Սևանի 2-րդ դպրոցում

«Անուշ» օպերայի նախերգանքի հնչյուններով բացվեց մեծ գրողի 145-ամյակին նվիրված միջոցառումը: 5-րդ դասարանցիների շուրթերից հնչում էին անմահ հանճարի բանաստեղծությունները, քառյակներն ու բալլադները. թախիծը, ժպիտն ու ուրախությունը փոխնիփոխ լցնում էին դահլիճը: Աշակերտների գեղեցիկ և արտահայտիչ խոսքը, երգն ու պարը գերեցին բոլորին` թե ուսուցիչներին և աշակերտներին, թե միջոցառմանը հրավիրված ծնողներին:

 

Հանդիսատեսին հիացրեց «Ախթամար» կոմպոզիցիայի բարձրարվեստ կատարումը, որում հմտորեն զուգորդվել էին մեղմ երաժշտությունը, սահուն զուգապարը և հեղինակային խոսքի գեղեցիկ ընթերցումը:

 

Միջոցառումը եզրափակվեց փոքրիկ դերասանների հրաշալի կատարմամբ ներկայացված «Անխելք մարդը» հեքիաթի բեմականացումով:

 

Հանդիսատեսը մեկ անգամ ևս Թումանյանական դաս առավ և բազում անգամ ծափահարեց ինչպես միջոցառմանը մասնակից աշակերտներին, այնպես էլ ցերեկույթի կազմակերպչին` դպրոցի հայոց լեզվի և գրականության ուսուցչուհի Հռիփսիմե Հովհաննիսյանին: