Համադպրոցական միջոցառում Ակնալճի Արա Հարությունյանի անվան միջնակարգ դպրոցում

Արմավիրի մարզի ակնալճի միջնակարգ դպրոցում տոնական տրամադրություն էր: Հայոց եկեղեցու պատմության ուսուցչուհի` Ար. Խրլակյանի նախաձեռնությամբ և դպրոցի աշակերտների մասնակցությամբ կազմակերպվեց և անցկացվեց հոգևոր միջոցառում` նվիրված «Տյառնընդառաջի» տոնին:

 

Աշակերտները զանգերի ղողանջների ներքո ողջունեցին հանդիսատեսին և ազդարարեցին տոնի ավետիսը.

 

-Հնչեցե'ք զանգեր ի լուր ամենքի,

-Տոնն է այսօր Տյառնընդառաջի,

-Լուսեղեն ցոլքեր երկնից իջնեն,

-Մարդկանց սրտերում ու հոգիներում

Հույսի, լույսի ճամփան բացեն:

 

Ողջունելուց հետո մասնակիցները և հանդիսատեսը «Տերունական  աղոթքով» շարունակեցին միջոցառումը: Միջոցառման ընթացքում ներկայացվեց բեմականացում, որտեղ Մարիամն ու Հովսեփը մանուկ Հիսուսին բերում են տաճար, որոնց ընդառաջ է գնում Սիմեոն ծերունին: Ավանդության համաձայն` Սիմեոնը Եգիպտոսի Պտղոմեոս թագավորի հրամանով Ալեքսանդրիայում մասնակցել էր Հին Կտակարանի գրքերը եբրաերենից հունարեն վերլուծելու «Յոթանասնից» թարգմանությանը: Թարգմանությունը կատարելու ժամանակ Սիմեոնը Եսայու գրքում հանդիպում է «Ահա կույսը պիտի հղանա ու որդի ծնի» նախադասությանը, մտածում է, թե շատերը թերևս չեն հավատա այս խոսքին, և ջնջում է այն: Որոշ ժամանակ իր արածի մասին մտորելուց հետո նիրհում է, իսկ երբ արթնանում է, տեսնում է, որ այն հատվածը, որը նա ջնջել էր, ոսկե տառերով նորից գրվել էր նույն  տեղում: Սիմեոնը փառաբանում է Աստծուն և երանի տալիս նրանց, ովքեր ականատես կլինեին այդ դեպքին: Աստծո Սուրբ Հոգին տեսնելով Սիմեոնի հավատքը, ասում է. «Մահ չես տեսնի, մինչև տեսնես Տիրոջ օծյալին»:

 

Տյառնընդառաջի Ծիսական կարգը ներկայացվեց դպրոցի բակում` խարույկի շուրջ: Խարույկը վառելու պատիվը տրվեց դպրոցի լավագույն ΙX «ա» դասարանին: Աշակերտները շուրջպար բռնեցին, որից հետո թռան խարույկի վրայից: Մեկնաբանելով Ծիսական կարգը շեշտեցին, որ ջահեր վառելը խորհրդանշում է Երուսաղեմի բնակիչների` 40 օրական Հիսուսին ջահերով ու ճրագներով ընդառաջ դուրս գալը, որի օրինակով քրիստոնյաներն են տոնի օրը ջահեր և մոմեր վառում:

 

Աշակերտները հիշատակեցին նաև, որ այս տարի Սուրբ Սարգսի տոնը զուգադիպել է Տյառնընդառաջին և մեզ համար դարձել կրկնակի տոն: Միջոցառման ավարտին նշվեց, որ Ամենայն հայոց կաթողիկոս Գարեգին Բ-ի հրահանգով Տյառնընդառաջը հռչակվել է նորապսակների օրհնության օր:

 

Միջոցառմանը ներկա էր դպրոցի տնօրինությունը, Էջմիածնի տարածաշրջանի քրիստոնեական դաստիարակության կենտրոնի պատասխանատու` Գյուլնազ Գրիգորյանը, ուսուցիչներ, ծնողներ աշակերտներ: Միջոցառման ավարտին դպրոցի տնօրինությունն իր գոհունակության խոսքն ասաց միջոցառման կազմակերպչին` Ար. Խրլակյանին և մասնակից աշակերտներին, իսկ Գ. Գրիգորյանը հավելեց, որ հոգևոր միջոցառումների կազմակերպումը օրհնություն է բերում թե՛ կազմակերպչին, թե՛ մասնակիցներին: