Տեղի ունեցավ «Դպրոցի արտաքին տեսքի ամանորյա ձևավորում» մրցույթի ամփոփման առաջին փուլը

«Dasaran.am» կրթական ծրագրի ցանցում ընդգրկված 959 դպրոցների շրջանում Ամանորյա տոներին ընդառաջ հայտարարված մրցույթին մասնակցել էին 380 դպրոց` ներկայացնելով դպրոցի արտաքին և ներքին տեսքի ամանորյա ձևավորման իրենց աշխատանքները: Այդ նպատակով ստեղծվել էին աշակերտներից, մանկավարժներից և ծնողներից բաղկացած դպրոցական խմբեր, ովքեր լուսանկարել են իրենց աշխատանքներն ու տեղադրել դրանք Dasaran.am կայքում` այդպիսով ներկայացնելով իրենց դպրոցի տոնական տեսքը: Մրցույթի ամփոփման ընթացքում հատուկ կարևորվել էր խմբային աշխատանքը, ինչպես նաև` աշակերտների կողմից ներկայացված ձեռքի աշխատանքները:

 

Մրցանակաբաշխությանը ներկա էին Երևանի քաղաքապետարանի հանրակրթության վարչության պետի տեղակալ Անահիտ Մելքոնյանը, մասնակից դպրոցների տնօրեններ, ծնողներ և այլ հյուրեր: Միջոցառմանը ներկա էր նաև «Dasaran.am» կրթական ծրագրի հիմնադիր նախագահ Սուրեն Ալոյանը, ով պատիվ ունեցավ հաղթողներին փոխանցել մրցանակակները: Երևանի թիվ 20 և թիվ 150 դպրոցները արժանացան գլխավոր մրցանակներին՝ ստանալով մեկական համակարգիչ: Ակտիվ մասնակցություն ցուցաբերած ևս 14 դպրոցներ ստացան պատվոգրեր և խրախուսական մրցանակներ:

 

Նշենք նաև, որ մրցանակաբաշխության եզրափակիչ փուլը տեղի կունենա ս.թ. փետրվարի 21-ին` ժամը 14:00, Կրթության ազգային ինստիտուտի հանդիսությունների սրահում (ք. Երևան, Տիգրան Մեծի պող., 67 շենք):