Միջոցառում` Տավուշի մարզի Թեղուտի միջնակարգ դպրոցում

Թեղուտի միջնակարգ դպրոցում տոնական տրամադրությունը պարուրել էր բոլորին. չէ՞ որ Հայոց բանակի մեծարման օրն էր ու գիտեին, որ այդ տոնի համար ընտրվել էր բացառապես այլ ճանապարհ. այն է` 90- ական թվականների պատերազմական շնչից ծնված անկոտրում, ուժեղ բանակի անցած ուղին ներկայացնելու, խրոխտ երգեր երգելուց` մինչև լիաթոք ծիծաղ հարուցող հումորներ:

 

Սկսում է միջոցառումը. տնօրեն Արգամ Թամրազյանն իր հակիրճ, սակայն խոսուն ասելիքով հպարտության զգացողություն է հաղորդում ներկաներին, նաև մեկ րոպե լռությամբ հարգանքի տուրք են մատուցում հերոսաբար ընկածների հիշատակին:

 

Ամանորյա տրամադրությունը` պարուրված բանակի օրվա տոնով հարթակ է հրավիրում վաղվա զինվորներին` 11-րդ և 12-րդ դասարանի տղաներին, որոնք անասելի արագությամբ քանդում ու հավաքում են ավտոմատը:

 

Շատ ուրախ էր դահլիճում.  իսկ ինչու՞ չուրախանալ, չէ՞ որ ունենք հզոր բանակ, որի ահեղ շնչից վախենում է մեզնից միլիոնավոր ավել թշնամին, և վերջապես, ինչու՞ չուրախանալ, երբ դպրոցի կամարների տակ բանակին արժանի հերթափոխ է մեծանում, և ռազմիկի գովքը երգող վաղվա հայ մայր:

 

Քեզ անկոտրում բազուկ ու կորով, Հայոց բանակ: