Բաց դաս` Ակնալճի միջնակարգ դպրոցի 9-րդ «ա» դասարանում

Դասարանում սովորող 22 աշակերտները նախապես բաժանվել էին խմբերի:

 

Առաջին խումբը կրում էր «Հանդուրժողականություն» անվանումը, իսկ երկրորդ խումբը` «Անհանդուրժողականություն»: Գրատախտակին գծված էին սխեմաներ, որոնք աշակերտների օգնությամբ և մասնակցությամբ ամբողջացվեցին:

 

«Հանդուրժողականություն» խումբը նկարագրեց հանդուրժող մարդուն` զիջող, ներող, բարի, կամեցող, մեծահոգի, միևնույն ժամանակ կարևորեց հանդուրժողականության սահմանափակ լինելը, նշելով, որ անսահմանափակության դեպքում առաջ կգան այնպիսի իրավիճակներ, որոնք հասարակության համար կդառնան վտանգավոր` ամենաթողություն, անտարբերություն, դիմացինի իրավունքի ոտնահարում:

 

«Անհանդուրժողականություն» խումբը ներկայացրեց թեմային վերաբերող երեք դրսևորումները` անձնական, կրոնական, քաղաքական, նշեց, որ եթե չլիներ կրոնական անհանդուրժողականությունը, ապա հայ ժողովուրդը Առաջին աշխարհամարտի ժամանակ չէր ունենա մեկ միլիոն ու կես մարդկային զոհ թուրքերի կողմից, որը որակվեց որպես ցեղասպանություն: 

Հայ ժողովուրդը ոչնչացվեց միայն նրա համար, որ քրիստոնյա էր:Զուգահեռ տրվեց պարզաբանում, որտեղ շեշտվում էր անհանդուրժողականության բացասական կողմը` ոտնահարել դիմացինի իրավունքները, լինել եսասեր, արհամարհող, բռնություն կիրառող, ամենալայն իմաստով` պատրաստ ֆիզիկական ոչնչացման:

 

Դասն անցավ հետաքրքիր ու քննարկման թեժ մթնոլորտում, որն ուսուցողական էր, որի ժամանակ աշակերտները քննարկման արդյունքում իմացան հանդուրժողականության հասկացությունը, կարողացան բնութագրել հանդուրժողական մարդուն:

 Աշակերտները իրենց սովորածը կկարողանան կիրառել իրենց կյանքի ընթացքում` հանդուրժողական մոտեցում ցուցաբերել միմյանց նկատմամբ, լինել բարի և բարեկիրթ:

 

Սեփական լրատվություն