ԱՊՀ և Բալթյան երկրների թարգմանիչներն ու և հրատարակիչները` Երևանում

Համաժողովի բացումը կկայանա ս. թ. նոյեմբերի 1-ին Մ. Մաշտոցի անվան հին ձեռագրերի ինստիտուտ Մատենադարանում նիստերի դահլիճում: Համաժողովին կմասնակցեն թարգմանիչներ, հրատարակիչներ, գրական գործակալներ ԱՊՀ և Բալթյան երկրներից:

 

Համաժողովի շրջանակներում կանցկացվեն ավանդական դարձած վարպետության դասեր, սեմինարներ, ընթերցումներ Երևանի առաջատար բուհերում: Նախատեսվում են նաև գրքերի թեմատիկ շնորհանդեսներ, այդ թվում, Բանահյուսությունը և ժամանակակից գրականությունը թարգմանական և հրատարակչական նախագծերում («Ռուսսկիյ Գուլլիվեր», «Էդիտ Պրինտ», «Զանգակ 97» հրատարակչություններ) և ժամանակակից գրական նախագծեր դասականների թանգարաններում:

 

Կկազմակերպվեն կլոր սեղաններ և սեմինարներ «Մանկական գրականություն և բանահյուսություն», «Բանահյուսությունը ժամանակակից գրականության մեջ», «Թարգմանական գրականության առաջ մղումը» թեմաներով:

 

Համաժողովի շրջանակներում նոյեմբերի 1-3-ը Հայաստանի ճարտարապետների միությունում կանցկացվի «Ֆոլքարտորիում», որն իրենից ներկայացնում է Հերիքնազ Գալստյանի (Հայաստան) և Տատյանա Դանիլյանցի (Ռուսաստան) աշխատանքների ցուցահանդես, ինչպես նաև հայկական ազգագրական պարեր ներկայացնող արար, որի մեջ կներգրավվեն համաժողովի այլազգի մասնակիցները:

 

Նշենք, որ համաժողովը կազմակերպվում է ՀՀ մշակույթի նախարարության հովանու ներքո և ԱՊՀ մասնակից-երկրների հումանիտար համագործակցության միջպետական հիմնադրամի (ՀՀՄՀ) աջակցությամբ:

 

Աղբյուրը` www.panorama.am